<قصه حنين وتركي>
عشت أنا كأي فتاه عشت حياتي بشكل طبيعي وأحلم باليوم اللي أتزوج فيه وأكون أسره_ لكن في يوم من ايام حياتي جاني أتصال لم أحسب له حسبان دق جوالي واذا به رقم غريب وترددت في الرد فتحت السماعه واذا به شخص يتعذر بأنه غلط في الرقم ويدق مره أخرى وأخذت أشتمه وألومه لكنه لم يستسلم وحسيت من جواي أن هالأنسان غير_ وأنه غير هالشباب وكان لطيف، وفي صوته نبره حزن وكنت أقول في نفسي وش سالفه هالانسان(أكيد راح تستغربون من أني أرتحت له لكن وربي يشهد علي أني أرتحت له كأنه مرسول لي) ولم أعرف أن هذا الأنسان سيجعله القدر جزء مني، ومرت الأيام وحبيت اعرف سر هالشخص ومن اول مكالمه كان صادق وصريح وكان عفوي وكل يوم أعيش فيه مع تركي لها مذاق خاص كانت أروع أيام حياتي كنا نزعل نقسى نبكي لكن يجمعنا قلب واحد أراضيه ويراضيني أبكي يمسح دمعتي يبكي أبكي معه عشنا ع الحلوه والمره / تعرفون تركي وش بالنسبه لي عيوني اللي أشوف فيها
كانت حياتي شبيهه بقصص الخيال وحبيت اجعل من حلمي حقيقه ويرى النور وأحققه مع تركي وجلست ألح عليه أنه يفاتح أهله أنه يخطبني وقال وش أقولهم خفنا من ردت فعلهم وجلست أنا وياه نفكر ونخطط كيف نقولهم الحقيقه؟ راح نخسر بعض بحكم المجتمع اللي عايشين فيه وبعد ماقفلت الدنيا في وجهنا_ قال رااح يكلم أخته واللي يصير يصير وكنت أرتعب وش راح تكون رده فعلها؟
هي رفضت الفكره لأنها خافت أكون من البنات اللعابات اللي ماهمها الا التسليه والكذب ع مشاعر الناس ومو بس البنات حتى الشباب نادرين اللي يحبون بصدق الا من رحم الله)
في البدايه زعلت وبكيت لأني مو من هالبنات وأنا مو كذا وبعد محاولات تركي مع أخته واقناعها وبعد ماشافت أخوها وكيف متعلق فيني وقد ايش جالس يتعذب وحست أن تفكيرنا شريف وقصدنا نجتمع في بيت واحد بالحلال_ وافقت وهالشي ماتصدقون قد ايش عطاني دافع حلو حسيت حلمي قرب يتحقق، ومر ع وضعنا هذا شهرين ومرتاحه أن أخته راح تساعدنا وخططت أنا وتركي ع أقرب فرصه أقابلها وحددت المكان وجاء الموعد وكنت في أبهى حله واستقبلتها وشافتني وعرفتها ع أهلي وحبتني وحبيتها وحسيت أني بطير من الفرحه وأن فكرتها تغيرت عني الى الأحسن وقامت قالت لي في وقتها(تشرفت بمعرفتك وتركي عرف يختار)
وعدتنا تكلم أم تركي وكلمت أمها وقالت لأمها أنها لقت لتركي خطيبه وهي صديقتها وهي تقصدني وجلست تمدح فيني_ والأم رحبت بالفكره لكن قالت خليني أشوف الوضع واوضاعهم، وكلمني تركي وبشرني وقال لي أن هند أخته كلمت أمه وقبلت بالفكره، وياااالله ما صدقت من الفرحه
وبعد اشهر من الصبر والأنتظار جاء اليوم الموعود وفجأه دق التلفون ورديت قالت: السلام عليكم
قلت:وعليكم السلام
من معي؟ قالت:أنا أم تركي
أنا هنا سمعت أم تركي تلعثمت وتخربطت وبغيت اجيب العيد ولكن حاولت أتماسك
قالت:من معي
قلت:حنين ياخاله
قالت:كيفك وكيف الأهل
قلت:طيبين_ طلبت أمي وركضت لأمي وأقولها أم صديقتي هند تبغاك
وردت أمي وأتفقوا ع الموعد وأنا جلست أفكر وش ألبس؛ وش أسوي حلى؛كيف أزين شعري
وفي اليوم الثاني أستعدينا ولبست وكشخت وفجأه دق الجرس وبديت أرتجف ودقات قلبي تدق بسرعه وأحس أنه بيغمى علي من الوناسه وخواتي فرحانات لي وبنت خالتي فديت روحها شوق مبسوطه لي
وجلسوا يسولفون وفاتحت أم تركي أمي بالخطبه وقالت أمي أن شاء الله خير_ وراحت الأم
وجات أمي عندي وقالت لي وش رأيك؟ استحيت وقلت بصلي وأشوف وأنا من جواي أبغى اسمع هالعالم أني مواااافقه وفرحااااانه أخيرا حلمي بيتحقق
وأهلي أنبسطوا من أهل تركي وشافوا فيهم البساطه والمحبه وأرتاحوا له ولأهله وهذا اللي أسعدني أكثر وسألوا عنه ومدحوا الولد وهذا خلاني أتعلق فيه أكثر ومر ع هذا الوضع 3 شهور وكنه 3 سنين وأنا أنتظر أهله يدقون ويشوفون جوابنا وهما ينتظرون ردنا_ هذي دواااامه أحنا ضحايااااها
أهلي يستنونهم يسألون وأهله يستنون أتصالنا
وجلست أنا وتركي حاطين يدينا ع قلوبنا ونستن موعد الخطبه
وجاء اليوم المشؤوم اللي دق علي فيه تركي وقال والعبره خانقته وحاول يخبي علي لكن حاولت أعرف وش سالفته
وقلت: وشفيك؟_ قال: حلمي اللي عشته معاك وحلمنا فيه سو وبنينا فيه كل أمانينا أشوفه ينهدم قدامي_وقلت: وش فيه وش صار وأنا خلاص مو قادره أستوعب حلم سنه و6 شهور بضيع سويت نفسي مو عارفه حاسه أنه كذب وقال أبوي رفض قلت له ليه؟قال: لازم تتزوج من بنات قريتك وأنا أبعد عنهم اميال (وللمعلوميه حنا من نفس القبايل) حسيت العذر غبي رفضت وبكييييت لين حسيت روحي بتطلع وماقدرت أتحمل وقلت لا لا مو راضيه أستوعب وضعنا وأن هذا نهايه حبنا_قلت له حاول تكفى لا تخليني لاتخلي كل شي بنيناه يضيع في غمضه عين وبسبب تفكير أبوه الغريب ورفضه لي_ حاولت أستوعب وضعي لكن ماقدرت بكييت وحبست عمري في غرفتي كانت من أتعس اياااااامي حاولت أعيش عمري وهم أنو في أمل يتغير رأي أبو تركي لكن لاحياه لمن تنادي _
ومن أحلامنا اللي نسجناها
أتفقت أنا وياه أنو لو صار شي تكون الملكه في شهر واحد بس تعرفون من اللي أنكتب لها تتملك بدالي في هذا الشهر خلود أخت تركي
وأبو تركي بيسوي لها حفله تشرفهاااا مو حاسدتها بس مقهوره على حلمي اللي ضاع حسبي الله ونعم الوكيل
حزنت ع أهلي وش أقولهم وش أعطيهم سبب صرت
أتهرب من أمي وش أجيب لها عذر أقول أنو أنا رفضت وماعدت أبغى أتزوج لكن راح تستغرب من رفضي لأنها في البدايه أستغربت موافقتي لأنو كل مايجي أحد يخطبني أرفض لدرجه أمي طفشت مني
صليت وبكيت ودعييت عليه من قلبي لأنه حرمني روحي
دعيت ربي يفرج همي وهمه ليت الأهالي زي مايحبون يعشون حياتهم بطريقتهم يخلون اولادهم يختارون شريكات حياتهم بنفسهم
كان وقوع هالخبر يوم الأحد ١٤٢٧_١٠_٢٨ وحسيت أن حلمي تبخر وأنقتل وأصبح سرااب وأنا عايشه حياتي لكن بدون هدف مات كل شي حلو بحياتي
بعد تركي عفت الدنيا صرت أعيش ليومي بس وجالسه ع ذكراه اللي لو لفيييت الدنيا ماراح الاقي مثله في الدنيا بطيبه قلبه ورقه أحساسه آآآآآه الأماكن كلها مشتاقه لك
وهذا بعض من مأساتي كتبتها لرد جميل لهذا الأنسان_ اللي حبه في قلبي ماتمحيه السنين اللي علمني معنى الحب ورباني على ايده وكان كل شي لي الأهل و الحبيب والأخ والصديق كان يعرف أني متضايقه من نبره صوتي كان يسوي المستحيل ولايشوفني حزينه ومتضايقه
وش أقول وش أخلي أن قلت ماراح أوفيه حقه وأن سكت راح أكون مقصره
تركي المعذره منك أنت الوحيد اللي تعرف قد ايش أحببك
ومني لأبو تركي ليش تحرق قلب أثنين يحبون بعض؟؟!
وهل أنتصرت بقسوتك؟؟
نفسي أعرف هل تملك الرحمه في قلبك!! ماأعتقد أنك تملكها لأنو مافي أحد يشوف ولده يتعذب ويموت بين يدينه وهو لم يحرك ساكن
ماأقساااك ياأبو تركي
مني لروحي
(تصدق أني أشتقت لك وأنا أعترف حياااتي بعدك تختلف ومهما تغيب عندي أمل أنك بتجي وبكل شوووق
أ_س_ت_ق_ل_ك)
(الا ياالله ياعالم بحالي تزيل الهم عن قلبي تزيله
خذت مني الليالي أعز غالي تفارقنا ولا باليد حيله)
(وأتم بعييد وتتم بعيد وأتم مثل الحزززن أنطر سحابه عيييد)
(ابني من الأحلام بنيان وصروح
أحلام ورديه غدت مالها ساس
تعبت أشيل الهم والوقت مسفوح
يطوي سنيني دون رحمه ولا أحساس
تدرون وش اللي يقهر القلب والروح؟؟
أنك تفارق منهو مالك الروح)
%وخوات تركي كلمه شكر و محبه ع كل وقفاتكم ومحبتكم لي وبالأخص هند أم فيصل%
(والله يرزقه اللي تعوضه وتسعده)
كتبت نبذه مختصره من سالفه عمري لان هالشي ماأقدر أبوحه للناس وبكذا صوتي راح يصل الملايين ويعرف الجميع مافي داخلي
*وكل من قرأ قصتي يدعي لي بالصبر وأن الله يفرجها علي
حررت في ٥/١/١٤٢٨
٢٠٠٧ ==> وش مخبي لي؟؟)
محبتكم همس الوداع